Relationship of Hydroxyproline Excretion in Urine to Collagen Metabolism

Summario in Interlingua

Hydroxyprolina es synthetisate per le hydroxylation de grande polypeptidas como un del phases terminal in le formation de collageno, e il pare que nulle altere mechanismo existe in vertebratos pro ille synthese. Per consequente, le presentia de hydroxyprolina in le tissus, le plasma, o le urina pote esser usate como mesura specific de collageno o de productos de degradation de collageno. Studios isotopic indica que le hydroxyprolina excernite per animales ha su origine tanto in le degradation de novemente synthetisate collagenos "solubile" como etiam in le grande reservas de metabolicamente stabile collageno nonsolubile in varie tissus. Multe factores pote afficer le quantitate de hydroxyprolina excernite, sed con le uso de technicas a isotopos il es possibile utilisar le excretion de hydroxypro definir le effectos principal de conditiones o agentes specific super le metabolismo de collageno in vivo.

Ben que alterationes in le excretion de hydroxyprolina non es specific pro un morbo particular, le mesuration de hydroxyprolina urinari se ha provate utile in un numero de situationes clinic. Le excretion de hydroxyprolina es generalmente augmentate in patientes con hypersecretion de hormon de crescentia, de hormon thyroide, e de hormon parathyroide, e illo monstra un tendentia descendente in le presentia de un hypoproduction del hormones mentionate. Le excretion de hydroxyprolina es etiam augmentate in varie disordines in que significative grados de lyse ossee occurre o in conditiones in le quales le catabolismo general de proteina es augmentate.