Immunologic Incompetence of the Neoplastic Lymphocyte in Chronic Lymphocytic Leukemia

Summario in Interlingua

Le objectivo del presente studio esseva definir comparativemente le responsa immunologic de lymphocytos leucemic e normal a base del utilisation de un manifestation visibile de un reaction de antigeno e anticorpore al superficie de ille cellulas como indicator de lor capacitate de producer anticorpore. Le methodo experimental consisteva in le immunisation serial de individuos normal e de patientes con chronic leucemia lymphocytic con un antigeno polyvalente de salmonella sequite del collection periodic de lymphocytos in sanguine peripheric per centrifugation differential. Post un meticulose processo de elution, le cellulas esseva incubate con le immunogeno bacterial, e humide preparatos sub laminas coperi-objectos esseva examinate per microscopia a campo obscur e a differentia de phase. Le adherentia de bacterios al superficio de lymphocytos esseva acceptate como evidentia de un combination de antigeno e anticorpore. Le natura physicochimic del anticorpore esseva characterisate per exponer le lymphocytos a mercaptoethanol. Sub le conditiones describite, bacterios se aggregava firmemente al superficie de lymphocytos normal e poteva esser prevenite de prender iste position per mercaptoethanol, e mercaptoethanol esseva etiam capace a detachar los. Bacterios nunquam esseva incontrate al superficie de erythrocytos, lo que indica que anticorpore humoral anti salmonella esseva non simplemente adsorbite a lymphocytos normal sed esseva formate intra iste cellula. Per contrasto con isto, lymphocytos leucemic esseva remarcabilemente libere de adherentias bacterial. Iste observationes suggere que normal lymphocytos de sanguine peripheric synthetisa anticorpore 19S a sensibilitate pro mercaptoethanol contra un specific antigeno bacterial. Tamen, un facto plus importante esseva que lymphocytos neoplastic non reageva in un maniera analoge. Il es possibile que iste indolentia immunologic reflecte un basic differentia biologic inter lymphocytos normal e lymphocytos leucemic. Il es etiam possibile que nos ha hic un explication del susceptibilitate de patientes con chronic leucemia lymphocytic de cader victima a sepse gram-negative, i.e., a infectiones que require le participation protective del immunoglobulinas 19S.