Congestive Heart Failure

Summario in Interlingua

Existe differentias de opinion concernente le disrangiamento fundamental responsabile pro congestive disfallimento cardiac, e le objectivo el presente conferentia esseva revistar le resultatos de studios effectuate in le Branca Cardiologic del Instituto Cardiac National visante a elucidar certes de ille mechanismos. Esseva monstrate que mitochondrios isolate ab cordes human in disfallimento exhibiva un alte grado de integritate functional e structural e que il existe in ille stato nulle diminution de provision de compositos phosphatic a alte energia. In plus, un studio del reservas myocardial tanto de triphosphato de adenosina e de phosphato de creatina in disfallimento cardiac tanto hypoxic acute como etiam congestive chronic provide nulle evidentia a monstrar que un carentia in le reservas de phosphatos a alte energia es responsabile pro le declaration de disfallimento cardiac. Assi il pare que le declino in le performance cardiac que occurre in disfallimento cardiac non pote esser attribuite a un collapso in o le production o le conservation de energia.

Es revistate le microscopia electronic del myocardio, providente un base ultrastructural pro le mechanismo de Frank-Starling. Le tension active depende del disposition del filamentos in le sarcomero al momento del declaration del contraction, e fortias maximal es generate quando le grado de imbricamento inter filamentos spisse e filamentos tenue es maximal. Disingagiamento de iste filamentos e glissage de fibras occurre in disfallimento cardiac.

Studios in le intacte corde, visante a quantificar depressiones del contractilitate cardiac, es revistate. Es signalate que disfallimento cardiac es characterisate per un reduction del velocitate maximal del elementos contractile sub un carga de zero. Es monstrate que in clinic disfallimento cardiac etiam le magnitude del accurtamento del musculos es reducite. Es demonstrate que il occurre in clinic disfallimento cardiac (1) depression del fluxo sanguinee in le antebracio, (2) elevation del resistentia vascular in le antebracio, e (3) reduction del hyperemic fluxo sanguinee in le antebracio post ischemia. Es etiam presentate evidentia pro le occurrentia de un augmento del tono venose in patientes con disfallimento cardiac.

Le anormalitates del functionamento sympathico-nervose que occurre in disfallimento cardiac es revistate, e es monstrate que le concentration de norepinephrina circulante es elevate durante exercitio in patientes con disfallimento cardiac e que lor excretion urinari de norepinephrina es etiam elevate, durante que lor reservas cardiac de norepinephrina es reducite. Es commentate le mechanismos responsabile pro le consequentias clinic de iste depletion.

Finalmente, es revistate le application de un test de tolerantia pro natrium oral in le diagnose de disfallimento cardiac e de stimulation electric in pares in le tractamento de disfallimento cardiac experimental.