Acute Leukemia in Adolescents and Adults

Summario in Interlingua

Es comparate le incidentia e le resultatos therapeutic in leucemia acute pro un total de 386 patientes adolescente e adulte presentate in le curso de 3 consecutive periodos quinquenne, i.e., le periodo del annos ab 1948 ad 1952 con 90 patientes, le periodo del annos 1953 ad 1957 con 136 patientes, e le periodo del annos 1958 ad 1962 con 160 patientes. Le augmento del incidentia in le successive periodos esseva plus marcate in casos del subgruppos de etates de plus que 29 annos. Le serie total includeva 213 masculos e 173 femininas. Morbo granulocytic occurreva in 185 patientes, morbo monocytic in 164, e morbo lymphocytic in 37. Antimetabolitos e corticosteroides—sol o in combination—esseva empleate in le tractamento de omne le patientes. Le tempores de superviventia de 100 e de 50 pro cento pro le patientes tractate durante le annos ab 1953 ad 1957 esseva plus longe que illos pro le patientes tractate in le periodo ab 1948 ad 1952, sed iste ganios non esseva mantenite durante le periodo ab 1958 ad 1962. Le declino del tempores de superviventia non es attribuibile a un alteration del incidentia per etate. Ben que plus juvene patientes continuava haber un melior prognose que lor plus ancian companiones de destino, iste avantage esseva minus marcate in le periodo del 1958 ad 1962. Ab le secunde periodo 2 remarcabile patientes supervive, habente attingite tempores de superviventia total de 11 e 7 e medie annos respectivemente a partir del momento del diagnose initial, sed il debe esser admittite que nos non ha progredite durante le ultime del tres periodos quinquenne in le tractamento de leucemia acute per medio de nostre methodos contemporari de therapia.