OWREN'S CAPILLARY BLOOD THROMBOTEST FOR OFFICE OR BEDSIDE CONTROL OF ANTICOAGULANT THERAPY: AN EVALUATION*†

Summario in Interlingua

Le thrombotest de sanguine capillar de Owren, le test del tempore de thromboplastina de Quick, le essayo combinate de activitate de prothrombina e proconvertina (P & P) de Owren e Aas, e le test del tempore de thromboplastina partial (cephalina) esseva effectuate simultaneemente in plure centenas de patientes, un medietate del quales esseva sub tractamento con drogas anticoagulante.

Le tempore de thromboplastina partial es dissatisfactori per se pro regular le dosage del anticoagulante, ben que illo pote esser prolongate per chronic excesso de dosage.

In le methodo usate, le lyophilisate reagente del thrombotest es reconstituite con aqua distillate; le libere fluxo de sanguine capillar—effectuate per un vulnere a lamina no. 11 de Bard-Parker in le aspecto lateral del quarte digito—es colligite in un siliconisate vitro de horologio; 0,1 ml de sanguine es pipettate a in 0,5 ml del reagente (que es hodie obtenibile con omne le componentes jam combinate), con le precaution de un previe calefaction a 37 C; e le tempore de coagulation es determinate. Le resultatos se lege directemente ab le curva logarithmic que es fornite con omne lot de reagente pro le thrombotest. Si iste valor es minus que 43%, illo es notate como resultato del test. Si illo es plus que 43%, un secunde specimen, amontante a 20 mm3, es pipettate a in un secunde tubo continente 0,5 ml del reagente, e le tempore de coagulation es determinate. Le resultato es de novo legite ab le curva de controlo e multiplicate per 4,3 pro provider un estimation plus fidel del plus alte valores. Iste mesuration dilutional es effectuate a fin que le resultatos pote esser legite in le plus ardue e per consequente plus accurate portion del curva de controlo. Specimens obtenite simultaneemente ab le quarte digitos dextere e sinistre del mesme patiente produce valores con alte grados de congruitate.

Con le uso del materiales empleate in le presente studio, un test de Quick de 25 secundas es le equivalente de 20% de activitate de P & P o de 12% de activitate del thrombotest. Le ordine de valores usualmente desirate como standard de anticoagulation es 20 a 35 secundas in le systema de Quick. Isto representarea 10 a 30% pro le essayo de P & P e 10 a 20% pro le thrombotest.

Le avantage theoric del manovra del thrombotest es le facto que—viste que illo es un combination del tempore de thromboplastina (in que un thromboplastina nonhuman resulta in coagulation in circa 40 secundas con normal plasma human) con le tempore de thromboplastina partial (in que cephalina produce un tempore de coagulation sol de 50 o 60 secundas con normal plasma human)—le systema deveni progressivemente plus sensibile pro le activitate del componente thromboplastinic (IX) del plasma in tanto que le activitate de prothrombina e de proconvertina declina. Isto—theoricamente—deberea resultar in le recognition del crescente risco de hemorrhagia secundari a pharmacogene carentia de componente thromboplastinic del plasma. Infelicemente—o plus tosto, felicemente—nulle del patientes in le presente serie esseva sufficientemente hyperdosate con anticoagulantes pro permitter le observation de iste aspecto del systema del thrombotest.