SJÖGREN'S SYNDROME IN ASSOCIATION WITH SCLERODERMA*

Summario in Interlingua

Le syndrome de Sjögren, in su stato de disveloppamento complete, consiste de siccitate e atrophia del conjunctiva, del cornea, del mucosa nasal e buccal, del lingua, del gurgite, e del vagina e de hyposecretion del glandulas gastric e alteremente endocrin. Recurrente nonsuppurative tumescentia parotidic es frequentemente presente. Le tests in uso pro establir le diagnose—le test de Schirmer e le examine ocular post rosa bengal o un altere appropriate tincturation—confirma le manifestationes ocular del disordine cognoscite como ceratoconjunctivitis sic. Le frequente occurrentia de arthritis rheumatoide in syndrome de Sjögren pare esser ben establite. A causa del frequentia de iste association, il pare plausibile expectar le occurrentia de syndrome de Sjögren in casos del altere morbos del gruppo collagenic que resimila arthritis rheumatoide in multe importante respectos. Le litteratura concernente iste syndrome e le morbos collagenic es revistate, e duo patientes con scleroderma e syndrome de Sjögren es reportate. A parte le reportate casos de morbo collagenic associate con syndrome de Sjögren, le presentia de allargamento parotidic (syndrome de Mikulicz) esseva observate in scleroderma e systemic lupus erythematose. Il existe observationes que suggere que iste casos representa possibilemente formas vestigial del syndrome de Sjögren e que le morbo de Mikulicz e le syndrome de Sjögren es variantes clinic de un complexo de symptomas causate per le mesme processo pathologic. Le possibilitate que un relation plus que casual existe inter syndrome de Sjögren e le morbos de collageno pote esser explorate per le examine systematic de omne patientes con disordines de tissu conjunctive per medio del test de Schirmer, del examine ocular post appropriate tincturation, e—in tanto que indicate—de biopsia del glandula parotidic.