RENAL PATTERNS IN MYELOMA*

Summario in Interlingua

"Ren myelomatic" es un termino pathologic que describe le alterationes associate con lamellate depositos de proteina in le tubulos renal de patientes con myeloma multiple. Myeloma es capace a producer injurias renal etiam per altere mechanismos, e le revista del experientias de un periodo de dece annos a iste hospital ha revelate que morbo renal es un masca commun de myeloma.

Un ingeniero de 58 annos de etate esseva hospitalisate a causa de dorsalgia e un marcate relentation del parlar e del pensar. Esseva trovate que su nitrogeno nonproteinic esseva grandemente elevate, sed su tension de sanguine esseva normal. Le constatationes de anemia, hyperglobulinemia, e de anormal cellulas plasmatic in le medulla del sterno confirmava le diagnose de myeloma. Al necropsia, extense quantitates de ancian e nove cylindros de proteina esseva trovate in le tubulos renal. Le infection esseva active in le pulmones, le subepicardio, e le renes (pyelonephritis superimponite).

Un patiente mascule de 63 annos de etate con dolores articular, diarrhea, e debilitate habeva anemia refractori a agentes hematinic. Studios additional revelava albuminuria, cylindros urinari, azotemia, e acidosis. Esseva facite le diagnose de acidosis reno-tubular. Un vigorose therapia de repletion electrolytic resultava transitorimente in un bon responsa, sed le patiente succumbeva con progressive debilitate, edema, e coma. Le necropsia revelava amyloidosis renal associate con myeloma multiple.

Un patiente mascule de 55 annos de etate experientiava exacerbation de symptomas de obstruction urinari durante que ille se trovava sub tractamento pro un sanguinante ulcere duodenal. Post resection transurethral de un grandemente allargate prostata, ille disveloppava diarrhea fulminante, con culturas fecal positive pro Staphylococcus aureus. Cessation functional del ren occurreva immediatemente, e le morte del patiente superveniva quatro dies post le operation. Le necropsia revelava "ren myelomatic" con superimposition de moderate grados de nephrosis hemoglobinuric. Myelomatosis afficeva le vertebras e le splen. In retrospecto le diarrhea micrococcal esseva attribuite al relative hypogammaglobulinemia que es characteristic de patientes con myeloma.

Un patiente mascule de 46 annos de etate habeva primo notate debilitate duo menses ante su hospitalisation. Esseva constatate grados sever de hypertension, con albuminuria, azotemia, e hemorrhagia in le fundos ocular. Ille habeva tusse, cardiomegalia, e paroxysmic dyspnea nocturne. Le nivellos seral de albumina e globulina esseva normal. Post un dose medie de reserpina, le patiente suffreva un irreversibile collapso circulatori e moriva post un periodo hypotensive de 18 horas. Le necropsia revelava sever grados de amyloidosis renal, generalisate amyloidosis arteriolar, e myeloma multiple.

In multe casos le correcte diagnose non esseva suspicite durante le vita del patiente e, de facto, non esseva trovate al completion del necropsia grossier. Amyloidosis esseva identificate al tempore del examine histologic, e le subjacente myelomatosis esseva discoperite solmente proque studios del medulla vertebral es un mesura routinari in le necropsias a iste hospital.

Le tres mechanismos per le quales myeloma pote producer morbo renal es: (1) Occlusion del tubulos renal per massive precipitatos de proteina myelomatic, (2) amyloidosis renal, (3) hypogammaglobulinemia secundari, con vulnerabilitate a sever infectiones, incluse pyelonephritis.

Es presentate un revista de recente progressos in nostre cognoscentias fundamental de myeloma.