SALT METABOLISM IN HYPERTENSION*†

Summario in Interlingua

Le metabolismo de chloruro de natrium in hypertension essential es anormal. Patientes con hypertension essential pote haber levemente elevate nivellos de natrium seral, un augmentate contento de natrium in le corpore total, e augmentate concentrationes de natrium e de aqua in le parietes arterial.

Hypertension pote esser alleviate per un depletion de natrium. Chlorothiazido, que es un potente agente natriuretic, es capace a producer un effecto antihypertensive tanto in animales hypertensive como etiam in patientes con hypertension. Iste droga produce un potentiation del effectos de varie regimes antihypertensive. Le administration concomitante de chlorothiazido reduce le requirimento de drogas de blocage ganglionic in le tractamento de hypertension. Patientes qui ha essite sympathectomisate responde usualmente al action reductori que chlorothiazido exerce super le tension del sanguine.

Es opinate que le augmentate rejection de natrium, chloruro, e aqua, per que le tubulos renal reage a cargas de sal in hypertension essential, es un effecto e non un causa del elevate tension de sanguine. Il existe nulle prova que le excretion de aqua, occurrente a grados in excesso del excretion de natrium, causa un "retention relative" de natrium in le majoritate del patientes con hypertension.

Es discutite le hypothese que in hypertension essential le contento de natrium in certe compartimentos o in certe histos—possibilemente le lisie musculo vascular—es augmentate e resulta in un elevation del tension del sanguine. Il es possibile que le effecto de chlorothiazido in le tractamento de certe casos de hypertension depende de su capacitate de privar tal histos de natrium. In altere casos le effecto de chlorothiazido pare producer se per le depletion del volumine de plasma.