THE CLINICAL EPIDEMIOLOGY OF POLIOMYELITIS*†

Summario in Interlingua

In le presente discussion del epidemiologia clinic de poliomyelitis, nostre interesse es concentrate super le conducta del infection intra le familia. Durante multe annos le raritate de multiple casos de iste morbo intra un sol menage esseva un aspecto mystificante que le epidemiologo trovava difficile a explicar. Tamen, in le curso del passate 20 annos, plus e plus datos ha essite accumulate que indica que, ben que usualmente solo un caso recognoscite de poliomyelitis occurre intra le mesme familia, le altere membros e specialmente le juveniles monstra un alte frequentia del infection velate per le facto que illes non disveloppa ulle symptoma.

Per le uso del nove technicas de histocultura in le isolation de viruses e in tests serologic, on ha executate un serie de studios que indica que al momento quando un caso es recognoscite in un familia, practicamente omne le altere susceptibile membros del mesme menage es etiam inficite, lo que es manifeste per lor excretion de viruses e per lor disveloppamento de significative responsas anticorporal. Assi il appare que poliomyelitis—in contrasto con previe opiniones—es extrememente contagiose intra le ambiente familial, de facto tanto contagiose como per exemplo rubeola. Frequentemente un juvene portante de un non-apparente infection introduce le virus de poliomyelitis a in le menage e infice su fratres e sorores e non infrequentemente etiam su parentes. In un recente eruption localisate, que comenciava inter le infantes de un schola maternal, il esseva constatate que 15 familias esseva inficite. In 14 de iste familias, ultra le infantes etiam le patre o le matre o ambes esseva involvite, e 2 del 3 casos clinic occurreva in adultos. Il es evidente que iste situation ha un interesse special pro le medico contemporanee, proque in recente annos le frequentia del morbo inter adultos ha grandemente accrescite tanto in le Statos Unite como etiam in certe altere areas. E in reguardo a poliomyelitis—precisemente como in reguardo a altere morbos viral—adultos es plus susceptibile a prender le infection in un forma sever con un resultante augmentation del mortalitate.